នារសៀលថ្ងៃទី២៩ ខែតុលា ឆ្នាំ២០២៥ លោកជំទាវបណ្ឌិត ចាន់ សុទ្ធាវី ប្រធានគណៈកម្មការនីតិកម្ម និងយុត្តិធម៌នៃព្រឹទ្ធសភា (គណៈកម្មការទី៦) បានអញ្ជើញអមសម្ដេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ចូលរួមក្នុងកិច្ចប្រជុំកម្រិតខ្ពស់ស្តីពី អនុស្សាវរីយ៍ខួបទី១០ នៃកិច្ចព្រមព្រៀងប៉ារីស ដែលរៀបចំឡើងជាផ្នែកមួយនៃវេទិកាសន្តិភាពប៉ារីសលើកទី៨ នៅទីក្រុងប៉ារីស សាធារណរដ្ឋបារាំង។
ក្នុងកិច្ចប្រជុំកម្រិតខ្ពស់នេះ មានវាគ្មិនសំខាន់ៗចូលរួមដូចជា ឯកឧត្តម អេម៉ាន្យួអែល ម៉ាក្រុង ប្រធានាធិបតីនៃសាធារណរដ្ឋបារាំង និងឯកឧត្តម មៀ អាម័រ ម៉ូត្លី នាយករដ្ឋមន្ត្រីប្រទេសបាបាដូស ព្រមទាំងមេដឹកនាំរដ្ឋាភិបាល និងតំណាងអង្គការអន្តរជាតិជាច្រើន ដើម្បីអបអរសាទរខួប១០ឆ្នាំ នៃសកម្មភាពអាកាសធាតុជាសកល។
កិច្ចប្រជុំនេះ មានគោលបំណងបង្កើនការសហការអន្តរជាតិស្តីពីបម្រែបម្រួលអាកាសធាតុ ក្រោមប្រធានបទ “សម្ព័ន្ធថ្មីសម្រាប់សន្តិភាព ប្រជាជន និងផែនដី” និងបានផ្តល់វេទិកាសម្រាប់ពិភាក្សាពីវឌ្ឍនភាព បញ្ចូលយុទ្ធសាស្ត្រអាកាសធាតុជាតិឲ្យស្របតាមគោលនយោបាយសកល និងលើកកម្ពស់វិធីសាស្ត្ររួមបញ្ចូលគ្នា ដើម្បីអភិរក្សជីវចម្រុះ អភិវឌ្ឍថាមពលស្អាត និងលើកកម្ពស់សុខុមាលភាពសង្គម។
ប្រភព៖ ការិយាល័យជំនួយការគណៈកម្មការទី៦ព្រឹទ្ធសភា
